Германските истражители сметаат дека експлозиите на гасоводите Северен тек 1 и 2 можеби биле изведени од украинска група под водство на тогашниот врховен командант на Украинската армија, генерал Валериј Залужни, пренесува The Wall Street Journal.
Според информациите на германската полиција, обвинителите и добро информирани извори, истражителите развиле детална слика како елитната украинска воена единица извршила саботажата. Наведената цел бил намалување на руските приходи од енергенти и прекин на економските врски меѓу Москва и Германија.
Истражителите од Потсдам ги следеле трагите преку компании за изнајмување бродови, телефонски броеви и регистарски таблички, што им овозможило собирање докази за издавање наредба за апсење на тројца војници од специјалната единица и четворица искусни нуркачи.
Клучен доказ била црно-белата фотографија од германска сообраќајна камера, на која лицето на украинскиот нуркач било идентификувано со софтвер за препознавање лица. Брзата проверка на профилите на социјалните мрежи ги довела истражителите до останатите осомничени.
Бидејќи мажот немал дигитални траги и не бил во европските бази на податоци, идентификацијата била предизвик. Сепак, граничната полиција на една земја го открила неговиот деловен пат, што овозможило пристап до неговиот вистински пасош. Утврдено е дека станува збор за Сергиј К., 46-годишен ветеран на Украинската служба за безбедност (СБУ), кој се придружил на специјалната единица од првиот ден на руската инвазија и командувал противвоздушната одбрана во битката за Киев.
Италијанските судови очекуваат одлука за екстрадиција на осомничениот во Германија до декември, каде треба да се соочи со судење. Германската полиција веќе подготвила специјален авион за негов транспорт од Италија во Хамбург.
Подсетуваме, судот во Болонија крајот на октомври веќе ја одобрил екстрадицијата на Сергиј К., но неговата одбрана поднела жалба до Врховниот суд, кој одлуката треба да ја донесе во рок од еден месец. Во меѓувреме, осомничениот започнал штрајк со глад, а украинскиот комесар за човекови права, Дмитро Лубинец, известил за влошување на неговото здравје.
