Данскиот пензиски фонд „Akademiker Pension“ најави дека ќе ги продаде американските државни обврзници што ги поседува, посочувајќи го лошото управување со јавните финансии во Соединетите Американски Држави како главна причина за ваквата одлука.
Од фондот потенцираат дека повлекувањето на капиталот нема никаква поврзаност со политичките тензии меѓу САД и Европа, ниту со прашањето за иднината на автономната данска територија Гренланд, за која интерес изрази американскиот претседател Доналд Трамп.
Директорот за инвестиции на „Akademiker Pension“, Андерс Шелде, за агенцијата АФП изјави дека одлуката е донесена поради „лошата состојба на американските владини финансии“, што, според него, наметнува потреба од барање алтернативни начини за управување со ликвидноста и ризиците. Тој додаде дека потегот не е директно поврзан со актуелните политички несогласувања меѓу САД и Европа.
Фондот во моментов поседува нешто повеќе од 85 милиони евра во американски државни обврзници, што претставува мал дел од неговата вкупна актива, проценета на околу 25,7 милијарди долари.
Во меѓувреме, на Светскиот економски форум во Давос, американскиот секретар за финансии Скот Бесент ги отфрли тврдењата дека европските инвеститори намерно го таргетираат американскиот долг како одговор на геополитичките прашања поврзани со Гренланд. Тој ваквите наводи ги нарече „целосно лажен наратив“ и предупреди дека евентуална координирана стратегија за повлекување на европскиот капитал би можела да го дестабилизира пазарот.
