Со голема церемонија на платото пред СЦ „Јане Сандански“ во Скопје, вечерва официјално беше затворен Европскиот младински олимписки фестивал 2025. На настанот присуствуваа спортистите учесници од Скопје и Куманово, кои го одбележаа овој значаен спортски настан.
Претседателот на Македонскиот олимписки комитет, Даниел Димевски, се обрати пред присутните и изрази голема надеж дека многу од младите спортисти кои настапија ќе станат идни спортски ѕвезди.
„Вие сте иднината и сегашноста. Ви благодарам за вашата посветеност и прекрасните изведби. Поставивте многу олимписки, светски, европски и лични рекорди кои ќе останат запишани во историјата на ЕМОФ Скопје. Македонија е мала земја, но со големо срце,“ истакна Димевски.
Претседателот на Европскиот олимписки комитет, Спирос Капралос, се заблагодари на сите кои беа дел од организацијата на фестивалот:
„Со длабока емоција можам да кажам дека направивте сè. Вашите перформанси беа гледани ширум Европа. Благодарност до сите 4000 спортисти кои учествуваа во 15 спортови. Покажавте дека не ви е важна само победата, туку и почитта кон противникот. Многу од вас ќе бидат идни Олимпијци. Благодарност и до целата организација, особено до волонтерите кои целосно беа ставени во функција на спортистите. Го прогласувам ЕМОФ 2025 за затворен.“
Следниот, 19-ти Европски младински олимписки фестивал ќе се одржи во Италија, која со освоени 50 медали, од кои 19 златни, беше најуспешна на фестивалот во Македонија.
