Во скопската населба Козле синоќа се случи невообичаена ситуација кога граѓани забележале волк што се движел низ улиците со синџир и огрлица, како да станува збор за домашно милениче. Настанот веднаш бил пријавен, по што на терен интервенирале полициски службеници од МВР, а потоа пристигнале и екипи од Зоолошката градина во Скопје за да ја преземат ситуацијата.
Животното било безбедно заловено без инциденти, а надлежните потврдија дека се работи за волк кој, според првичните информации, најверојатно бил чуван во заробеништво и успеал да се оддалечи од својот сопственик. И покрај неговата дивја природа, волкот бил забележливо мирен и навикнат на човечко присуство, што дополнително ја олеснило интервенцијата.
По заловувањето, тој е префрлен во Зоолошката градина – Скопје, каде што ќе помине задолжителен карантин и ветеринарен надзор. По тој период, животното ќе биде трајно згрижено во соодветни услови под грижа на стручни лица.
Од Зоолошката градина упатија и јасно предупредување дека чувањето диви животни како домашни миленици е строго забрането и носи сериозни ризици. „Волците не се миленици. Тие се диви животни со силни инстинкти и специфични потреби кои не можат да бидат исполнети во домашни услови,“ порачаа оттаму, додавајќи дека секое сомнително или нелегално чување диви животни треба веднаш да се пријави до надлежните институции.
