Денес делови од Скопје ќе останат без вода поради интервенции на водоводната мрежа, информира ЈП „Водовод и канализација – Скопје“.
Најголемиот прекин е предизвикан од уличен дефект на цевка со дијаметар од 80 милиметри на булеварот „Партизански Одреди“ број 18б. Поради тоа, од 9 часот наутро па сè до целосно завршување на санацијата, водоснабдувањето ќе биде прекинато во поширокото подрачје околу „Буњаковец“, опфаќајќи делови од улиците „Дебарца“, „Мирослав Крлежа“, „Коле Неделковски“, „Антоние Грубишиќ“, „Отон Жупанчиќ“ и „Радњанска“, како и основното училиште „Коле Неделковски“.
Покрај оваа интервенција, од 10 часот без вода ќе останат и дел од жителите на улиците „Багдатска“ и „Атинска“ во населбата Тафталиџе. Причината таму е изведување уличен приклучок на „Багдатска“, што исто така бара привремено исклучување на водоводната мрежа.
Од претпријатието апелираат до граѓаните за разбирање додека траат работите, нагласувајќи дека екипите се на терен и работат на што побрзо нормализирање на снабдувањето.
