Како дел од воспоставената соработка меѓу Клиничката болница во Битола и Универзитетската клиника за радиотерапија и онкологија од Скопје, и овој месец ќе продолжат редовните специјалистички онколошки прегледи за пациентите од пелагонискиот регион.
Од битолската болница информираат дека во петок, на 18 јули 2025 година, прегледите ќе ги врши д-р Симонида Црвенкова, додека на 25 јули прегледите ќе ги спроведува д-р Ленче Костадинова.
Прегледите се овозможени со согласност од Министерството за здравство, со цел да се намали потребата пациентите да патуваат до Скопје за специјалистичка нега. На овој начин, пациентите добиваат навремена и стручна здравствена услуга директно во Битола, во рамки на онколошкото одделение при Клиничката болница.
Со оваа иницијатива, здравствениот систем прави значаен чекор кон подобрување на достапноста на онколошките услуги за граѓаните надвор од главниот град.
