Коалицијата „Влен“ најави ново политичко прегрупирање, со кое пет од нејзините составни политички субјекти ќе се слеат во една заедничка организација, што според нив претставува почеток на поцврста и поединствена фаза во албанскиот политички корпус во земјата.
Од коалицијата порачуваат дека со овој чекор се става крај на, како што велат, долг период на расцепканост и влијание на тесни интересни групи во албанската политика. Тие тврдат дека досегашниот модел овозможувал одлуки да се носат зад затворени врати и во корист на мал број поединци, наместо во интерес на пошироката заедница.
„ВЛЕН се трансформира во единствена политичка сила“, стои во нивната порака, во која дополнуваат дека обединувањето е неопходно за, како што наведуваат, заштита на политичкиот глас на Албанците и за прекин на практиките на поделби, политички притисоци и задкулисни договори.
Пет различни политички субјекти, според најавата, отсега ќе функционираат како една целина. Од таму нагласуваат дека токму таквата структура ќе овозможи поорганизирано и поефикасно политичко делување.
Новата платформа, како што велат од „Влен“, ќе се темели на неколку клучни столбови: владеење на правото, бескомпромисна борба против корупцијата, независни институции на правдата, забрзување на европските интеграции, силно партнерство со НАТО, како и зачувување на семејните вредности, традицијата и културниот идентитет.
