Вицепремиерот и министер за транспорт и врски, Александар Николоски, соопшти дека е завршена целосната реконструкција и надградба на болницата „8-ми Септември“, проект вреден 12 милиони евра реализиран во соработка меѓу Владата и ТАВ.
Според Николоски, со реконструкцијата болницата ќе стане една од најмодерните здравствени установи во државата и ќе обезбедува подобри услови за пациентите и медицинскиот персонал.
„Навистина е посебно чувство кога се завршува еден голем проект што има огромно значење не само за градот Скопје, туку и за целата држава каде што секојдневно доаѓаат пациенти од цела Македонија, барајќи врвна здравствена услуга“, истакна Николоски.
Тој изрази надеж дека во обновената болница ќе се реализираат успешни оперативни зафати и ќе се лекуваат голем број пациенти.
„Се надевам дека од тука ќе излегуваат добри приказни, успешни оперативни зафати, излекувани пациенти и луѓето ќе си заминуваат со насмевки“, порача Николоски.
