Со нова регулатива треба да се стимулира поголемо производство на струја од страна на домаќинствата
Домаќинство или заедница на домаќинства во зграда може да изградат постројка за производство на електрична енергија од обновлив извор на енергија, при што произведената електрична енeргија ја користат за сопствена потрошувачка, а вишокот на произведената електрична енергија го предаваат во електродистрибутивна мрежа. Бројот на такви потрошувачи-производители на крајот од 2024 година бил 813, покажува Извештајот на регулаторната комисја за енергетика. Вкупната предадената електрична енергија од страна на потрошувачите – производители во дистрибутивниот систем изнесува 12,3 GWh, што претставува зголемување од 90 проценти во однос на 2023 година, пишува Слободен Печат.
Во моментов тече рокот за јавна расправа за Законот за обновливи извори на енергија, а според најавите на Министерството за енергетика ќе се зголеми прагот за електраните на домаќинствата или потрошувачите-производители на 10 киловати од сегашните 6.
-Прв пат во законската регулатива се предлага воведување законски рок за административната постапка за издавање дозволи за поставување кровни фотоволтаици за потрошувач – производител – најавија од ресорното министерство.
„За енергетски објекти со инсталирана моќност еднаква или помала од 10,8 kW кои користат ОИЕ и/или се демонстрациони проекти, се применува поедноставена постапка за приклучување на електродистрибутивната мрежа“, пишува во предлогот на Законот за користење на енергија од обновливи извори.
