Пред новогодишните и божиќните празници, Агенцијата за храна и ветеринарство (АХВ) спроведе засилени контроли низ целата земја, насочени кон заштита на здравјето на потрошувачите. Резултатите се алармантни: уништени се над 624 килограми небезбедна храна, од кои најголемиот дел – 567 килограми – се производи од месо.
Инспекторите изрекоа 60 парични казни, чија вредност во денарска противвредност надминува 33.000 евра, а дополнително се издадени опомени и решенија за отстранување на утврдените недоследности.
Контролите беа насочени кон ресторани, гостилници, месарници, месарници со работилници, рибарници и други специјализирани продавници за храна од животинско потекло – места каде побарувачката расте токму во периодот на празници. Вкупно беа извршени 423 надзори во угостителски објекти и 228 вонредни контроли кај оператори со храна од животинско потекло.
Најчесто утврдените нерегуларности се однесуваат на:
- Несовршени здравствени прегледи на вработените
- Недоволна хигиена и неисполнување на микробиолошките стандарди
- Нерегистрирани оператори со храна
- Небезбедна или со истечен рок храна
- Несоодветно складирање и селектирање на производите
- Нередовно водење на записи за HACCP, добра хигиенска и производствена пракса
- Неспроведена дезинфекција, дезинсекција и дератизација
- Производи без декларации или со нејасни етикети
Од АХВ апелираат граѓаните да купуваат храна само од регистрирани и одобрени објекти, да ги проверуваат декларациите и начинот на чување на производите. Исто така, домашната хигиена, правилната подготовка и складирање на храната на соодветна температура се клучни за безбедноста на потрошувачите.
