Универзитетот „Св. Климент Охридски“ – Битола ја објави дополнителната конкурсна рунда за запишување студенти на вториот и третиот циклус студии. Според објавените податоци, вкупно 548 кандидати можат да се запишат на магистерски, а 117 на докторски студии на различните универзитетски единици при УКЛО.
Меѓу универзитетските единици со најмногу слободни места за магистратура, предводи Правниот факултет во Кичево со 78 места, додека Техничкиот и Педагошкиот факултет во Битола нудат по 73 слободни позиции за идните магистранти.
Дополнително, кандидатите имаат можност да се запишат и на специјализирани насоки при Институтот за тутун во Прилеп, каде се изучуваат Производство на тутун, Обработка и преработка на тутун и Агроменаџмент во тутунското стопанство. За љубителите на археологијата, Институтот за старословенска култура во Прилеп нуди 10 слободни места на насоката Класична археологија.
Исто така, дополнителниот конкурс опфаќа и докторски студии на осум универзитетски единици, како и на Научниот институт за тутун во Прилеп, со вкупно 117 места.
