Советите речиси 20 години копале кон центарот на Земјата – на 12 километри ги дочекале услови што никој не ги очекувал
Речиси две децении траел еден од најамбициозните научни проекти на поранешниот Советски Сојуз – обидот човекот да продре подлабоко во Земјината кора отколку кога било претходно.
Проектот не бил само трка за соборување рекорд во длабочина. Тој бил дел од поширокото технолошко и научно натпреварување меѓу Соединетите Американски Држави и тогашниот СССР, двете суперсили кои со децении ја демонстрирале својата моќ во различни области – од вселенските истражувања и развојот на нуклеарно оружје, до обидите да се проникне што подлабоко во внатрешноста на Земјата.
Советскиот Сојуз во 1970 година го започнал проектот Кола – супердлабока дупнатина, на полуостровот Кола, на крајниот северозапад на Русија.
По години непрекинати обиди, дупчењето достигнало длабочина од 12.262 метри.
Со тоа Кола станала најдлабоката вештачки создадена точка во Земјината кора според вертикалната длабочина.
Но и покрај импресивната бројка од повеќе од 12 километри, човештвото успеало да помине само исклучително мал дел од патот до центарот на планетата.
Само 0,2 проценти од патот до центарот на Земјата
Просечниот полупречник на Земјата изнесува околу 6.371 километар.
