Новата функција на Apple – Live Translation, која овозможува симултано преведување преку AirPods слушалките со поддршка на Apple Intelligence, засега нема да биде достапна за европските корисници.
Иако Apple ја претстави услугата заедно со новите iPhone и AirPods Pro 3, поради строгите регулативи во Европската Унија околу користење на вештачка интелигенција и заштита на податоци, функцијата нема да биде пуштена на европскиот пазар.
Преведувањето во живо ќе стартува со поддршка за англиски, француски, германски, португалски и шпански, а до крајот на годината ќе бидат додадени уште четири јазици – италијански, јапонски, корејски и кинески (поједноставен). Сепак, Apple прецизира дека услугата нема да функционира ако корисникот има Apple сметка поврзана со земја од ЕУ и се наоѓа на територијата на Унијата.
Со тоа, европските корисници ќе можат да ја користат функцијата само кога ќе патуваат надвор од ЕУ, додека посетителите од други региони ќе можат да ја користат и во Европа. Ограничувањето најверојатно е привремено, додека не се усогласат правилата и безбедносните стандарди.
Live Translation ќе биде достапен на iPhone 15 Pro и понови модели со Apple Intelligence, а ќе може да се користи со AirPods Pro 3, AirPods Pro 2 и AirPods 4 веднаш со објавата на iOS 26, која е закажана за 15 септември.
