Од денес, еден од најпознатите симболи на Рим – Фонтана ди Треви – станува делумно „платена зона“. Туристите и сите нерезиденти ќе треба да издвојат две евра за да влезат во областа околу фонтаната, која досега беше бесплатна за секого. Влезницата ќе важи од понеделник до петок, од 11:30 до 22 часот, а во викендите посетителите ќе можат да ја видат од 9 до 22 часот, со последен влез во 21 часот.
Жителите на Рим, пак, ќе можат да пристапат бесплатно со лична карта, како и лицата со попреченост и нивните придружници, децата под шест години и туристичките водичи. По 22 часот, фонтаната останува отворена за сите, без влезница.
Одлуката следи по едногодишен пробен период кој привлече над 10 милиони посетители – дневно просечно 30.000, а во „врвни“ денови дури 70.000 луѓе. За да се справи со толпите, властите поставија огради за редење на посетителите и за заштита на самата знаменитост.
Од 3 февруари пак, ќе се воведе влез од пет евра за пет претходно бесплатни музеи и споменици, меѓу кои Вилата на Максенциј, Наполеоновиот музеј и Музејот „Карло Билоти“. Жителите и студентите од Рим и околните провинции остануваат со бесплатен пристап.
