Министерката за финансии, Гордана Димитриеска-Кочоска, денеска ги смири граѓаните, нагласувајќи дека нема причини за паника околу снабдувањето со нафта и бензин. Според неа, состојбата е целосно стабилна и се следи континуирано.
На новинарските прашања по панелот за економски раст во Владата, Димитриеска-Кочоска истакна дека вчера се одржал состанок со сите нафтени компании, на кој ниту една не пријавила проблеми со залихите. Инспекторите на Државниот пазарен инспекторат, додава, веќе се на терен, проверувајќи повеќе од 100 бензински пумпи во рок од едно деноноќие.
„Во секоја ваква ситуација се наоѓаат поединци кои се обидуваат да остварат профит преку вештачки кризи. Но, состанокот беше одличен, сите компании потврдија дека нема проблеми со залихите. Состојбата е под контрола, нема потреба од паника“, рече министерката.
Таа потсети дека законот за акцизи има вграден механизам за автоматска стабилизација. Доколку Владата прогласи кризна состојба, министерот за финансии автоматски може да ја промени висината на акцизата, од 1 до 4 денари во зависност од движењето на цената на нафтата.
Димитриеска-Кочоска советува прашањата за цените да се упатуваат до Регулаторната комисија за енергетика (РКЕ), која ќе заседава во понеделник. Таа нагласи дека министерството не планира дополнителни инспекциски контроли и дека организациските застои на поединечни пумпи се нормална појава во транспортот на горивото од складиштето до продажните места.
„Некои пумпи забележаа краткотрајно недостасување на гориво, но тоа е во рамки на организацијата на компаниите и не претставува проблем. Цените денес се стабилни, па дури забележавме и намалување од еден долар во споредба со вчера“, додаде министерката.
