Српската полиција извести дека во голема полициска акција под кодно име „Армагедон“ на повеќе локации се уапсени седум лица осомничени за тешки кривични дела поврзани со децата и детска порнографија.
Надлежните соопштија дека приведените – Б.Ф. (1969), П.М. (2002), Д.Н. (1988), Б.Р. (1954), С.С. (1962), П.С. (1962) и М.О. (1982) – се сомничат дека подолг период преку DarkWeb преземале, складирале и разменувале материјал што потекнува од сексуална експлоатација на малолетници.
При претресите во нивните домови, полицијата открила електронски уреди полни со големи количини фотографии и видеа кои, како што наведуваат од полицијата, прикажуваат сериозна злоупотреба на деца, најчесто на возраст од 4 до 14 години. Делата што наводно се документирани на пронајдениот материјал биле категоризирани според возраст, пол и други критериуми.
Осомничените се задржани во полициска станица до 48 часа и ќе бидат изведени пред надлежното обвинителство со соодветни кривични пријави.
Акцијата, која ја воделе припадници на Службата за борба против високотехнолошки криминал, Управата за технологија, како и специјалното одделение на Вишото јавно обвинителство во Белград, била реализирана со поддршка на единици од Белград, Сомбор, Ниш и Нови Сад.
