По три години очекување, денеска во Лариса почнува судскиот процес за железничката несреќа кај месноста Темпи, која го потресе цела Грција. Судот, со 36 обвинети и 353 сведоци, ќе се одржува во специјално прилагодена судница во конгресниот центар на Универзитетот Тесалија, откако локалните судови немаа капацитет за толку голем предмет.
Железничката несреќа, која се случи на 28 февруари 2023 година околу 23 часот, ја однесе животот на 57 лица, главно студенти, а над 100 беа повредени, од кои 32 сериозно. Страшниот судир се случи кога патнички и товарен воз се движеле по иста шина во спротивна насока.
По почетокот на судењето, грчката железница најави 24-часовен штрајк, а пред конгресниот центар веќе се подготвуваат протести. Роднините на жртвите преку Здружението „Темпи“ бараат правда, но и гаранции дека трагедијата нема да се повтори.
Меѓу 36-те обвинети, 33 се кривично гонети за „опасна интервенција во железничкиот сообраќај со евентуална умисла“, со можни доживотни казни, а истовремено се товарат и за убиство од небрежност, тешка и лесна телесна повреда. Меѓу нив се одговорниот на станицата во Лариса кој наредил двата воза да се движат по иста шина, неговите колеги, претпоставени, поранешни директори од Министерството за транспорт и инфраструктура, како и раководители од железницата и компаниите за инфраструктурни проекти.
Сведочењето ќе биде масовно: од 352 сведоци, 230 ќе ја поддржат обвинителната страна, меѓу кои роднини на загинатите, преживеани и адвокати, додека останатите 122 сведоци ќе ги дадат своите искази за околностите на несреќата.
Процесот е еден од најобемните во Грција во последните децении. Вклучени се над 200 адвокати, а предметот содржи повеќе од 500 документи. Судењето може да трае и до две години, а целиот комплекс е под строги безбедносни мерки со ограда и обезбедување уште од летото.
Конгресниот центар е претворен во судница со капацитет за 500 лица, додека другите простории служат за новинари, адвокати и следење на рочиштата преку монитори.
Во изминатите три години, семејствата на жртвите и граѓаните континуирано протестираа, барајќи одговори за причините и одговорностите. Здружението „Темпи“ повика на поддршка од синдикати и студентски организации, нагласувајќи дека „оваа битка за вистината не смее да остане само во судницата“.
