Министерот за економија на Хрватска, Анте Шушњар, најави измени на Законот за трговија и Законот за претприемачки активности, со кои се предвидува поголема улога на локалната самоуправа во регулирањето на продажбата на алкохол и работното време на продавниците.
Според предложените измени, општините и градовите ќе имаат можност самостојно да одлучуваат дали ќе дозволат продажба на алкохолни пијалоци во одредени временски интервали, особено во периодот од 20 часот навечер до 6 часот наутро.
Шушњар истакна дека мерките имаат за цел да го подобрат здравјето на граѓаните, особено на младите, како и да придонесат за зачувување на јавниот ред и мир, заштита на животната средина и културното наследство.
„Оваа одлука ја оставаме на локалните власти, бидејќи тие најдобро ги познаваат потребите на своите граѓани“, нагласи министерот.
Во однос на измените на Законот за претприемачки активности, тој посочи дека клучен фокус е намалувањето на административниот и финансискиот товар врз бизнисите. Меѓу новитетите е и воведувањето на институтот „привремен администратор“, кој ќе овозможи продолжување на работењето на компаниите и по смртта на претприемачот, без веднаш да се исполнат сите квалификациски услови.
Дополнително, се предвидува претприемачите да можат да продолжат со работа и по пензионирањето, без обврска да го затворат својот бизнис, што досега беше задолжително. Тие ќе можат да работат и со скратено работно време додека примаат пензија.
