Словенечката полиција пронајде тело на 31-годишна австриска државјанка во шума близу Мајшперк, соопшти Полициската управа во Марибор. Жената исчезнала минатиот викенд, а во последните денови ја барале и словенечките и австриските власти.
Кривични истражители извршиле увид на местото на злосторството, присуствувале и дежурен истражен судија и државен обвинител. Главен осомничен е 31-годишен словенечки државјанин со постојан престој во Австрија, поранешен партнер на жртвата, кој веќе бил уапсен и предаден на австриските судски власти.
Според медиумите, осомничениот наводно ја задавил својата поранешна партнерка, го ставил телото во куфер и го закопал во шумата. Тој со информации добиени по неколкучасовно испрашување ја упатил полицијата до местото на наоѓање на телото.
Жртвата последен пат била видена рано наутро во недела, откако се вратила од забава и испратила порака на пријател дека безбедно пристигнала дома. Таа требала да учествува на фотосесија во Грац, но не се појавила. Семејството и колегите веднаш ја пријавиле исчезнатата, а полицијата наскоро насочила сомневања кон нејзиното поранешно момче, кое неколку пати преминал преку австриско-словенечката граница.
