Двајца мажи осомничени за терористички активности беа уапсени по долга и ризична полициска акција во албанскиот регион Орош, во близина на Мердита. Операцијата, реализирана под кодно име „Орош“, беше спроведена со учество на специјалните единици „Ренеа“, полицијата од Пук и тимот за брзи интервенции „Шќипоња“.
Акцијата започнала со опколување на напуштена куќа каде што бегалците Јулиан Чумраку и Арбен Ука се криеле речиси еден месец. Според информациите објавени од Топ Чанел, опсадата траела околу дванаесет часа, а двајцата вооружени мажи активно се спротивставувале – упатувале закани и пукале кон полицијата, одбивајќи да се предадат.
По повеќечасовни преговори, во кои учествувале и нивни роднини, осомничените конечно се предале. При интервенцијата, Ука бил ранет и пренесен во болницата во Скадар, каде што е надвор од животна опасност. И двајцата веќе подолг период биле под надзор на антитерористичките служби, а за Чумраку постојат сомнежи за директни врски со терористички групи.
При претресот на куќата бил пронајден голем арсенал оружје – автоматски пушки, пиштоли, рачни бомби, значајни количества муниција и елементи за изработка на експлозивни направи, како и знамиња на Исламската држава. Според истражителите, овие материјали укажуваат на потенцијална радикализација и можни врски со терористички мрежи.
Албанските власти информираа дека истрагата продолжува и се проверува дали Чумраку и Ука биле дел од поголема структура и дали подготвувале планови за терористички напади.
