Ако за празничниот викенд планирате патување кон Грција, проверката на возилото станува речиси задолжителен чекор, не само од безбедносни причини, туку и за да се избегнат новите, значително построги казни што ги воведоа тамошните власти.
Грчките сообраќајни правила неодамна се заострени, а најмногу внимание привлекува измената во стандардот за комплетот за прва помош. Сега се бара тој да биде усогласен со новата верзија DIN 13164:2022 и да содржи проширена листа од 16 елементи. Меѓу нив се вклучени термо-ќебе, различни видови преврски за изгореници и заштитни маски. Доколку возилото не го исполнува овој стандард, возачите ризикуваат парична казна од околу 30 евра, што речиси е еднакво на цената на нов, усогласен сет.
Но тоа не е единствената промена што треба да се има на ум. Според информации објавени од грчки медиуми, како порталот „Прототема“, властите воведуваат и построг надзор на повеќе сообраќајни сегменти. Ограничувањето на брзината во урбаните средини е намалено од досегашните 50 на само 30 километри на час, што значително го менува ритамот на возење низ градовите.
Дополнително, листата на задолжителна опрема во автомобилот останува непроменета, но се контролира многу поригорозно: противпожарен апарат, предупредувачки триаголник, рефлектирачки елек и резервна гума мора да бидат присутни и лесно достапни во секое возило.
