Прилеп деновиве блеска во пролетна убавина, а посебен белег на градот му даваат расцветаните јапонски цреши, кои со својата нежна розова боја создаваат вистинска природна идилија. Овие дрвја се засадени во чест на македонската музичка легенда Тоше Проески, симболизирајќи љубов, спомен и трајна вредност за градот.
Од ЈКП „Комуналец“ – Прилеп истакнуваат дека континуирано работат на одржување на јавните површини, со цел градот да остане чист, уреден и пријатен за живеење. Особено внимание се посветува на парковите и зелените појаси, каде што граѓаните најчесто го поминуваат своето слободно време.
Пролетната раскошност не само што ја разубавува урбаната слика, туку и ја поттикнува свеста кај граѓаните за зачувување на животната средина и заедничката грижа за јавниот простор.
„Комуналец“ апелира до сите прилепчани да ја чуваат оваа убавина и заеднички да придонесат Прилеп да остане чист и убав град во текот на целата година.
