Севернокорејскиот лидер Ким Џонг Ун повторно е избран за генерален секретар на Работничката партија на Кореја, највисоката политичка функција во државата, на конгресот одржан во Пјонгјанг. Државните медиуми го претставија изборот како „едногласна поддршка“ за неговото раководство и за курсот на земјата кон зајакнување на нуклеарниот арсенал и воената моќ.
Според официјалните извештаи, делегатите го пофалиле Ким за „зацврстување на позицијата на државата“ и за значителен напредок во развојот на нуклеарното оружје и ракетната програма, кои Пјонгјанг ги смета за клучни гаранции за безбедноста на режимот.
Конгресот на партијата е највисокото политичко тело во Северна Кореја и се одржува ретко, што му дава дополнителна тежина на овој избор и на пораките што беа испратени од врвот на државата.
Во своето обраќање, Ким ја повторил намерата за понатамошно јакнење на одбранбените капацитети, вклучително и развој на нови нуклеарни и ракетни системи. Пјонгјанг истовремено ја претстави оваа политика како одговор на „надворешните закани“ и на военото присуство на САД и нивните сојузници во регионот.
Аналитичарите оценуваат дека реизборот на Ким не претставува изненадување, но испраќа јасен сигнал за континуитет на тврдиот безбедносен курс и за можни нови тестирања на оружје во наредниот период.
