Рускиот претседател Владимир Путин покажува воздржаност во воените дејствија кога американски функционери престојуваат во Украина, што според украинскиот претседател Володимир Зеленски е јасен показател дека се плаши од Соединетите Американски Држави.
Во интервју за американската телевизија Newsmax, Зеленски наведе конкретен пример со неодамнешната посета на американскиот специјален претставник Кит Келог.
„Генералот Келог пристигна и две ноќи по ред немаше масовни бомбардирања врз Киев. Тоа е интересен пример. Луѓето дури се шегуваат дека треба да му дадеме украински пасош“, изјави Зеленски.
Тој нагласи дека Русија користи заплашувања, уцени и создавање на тензии како средство за притисок, но ретко се одлучува за целосна ескалација кога се присутни американски претставници.
„Ова значи само едно – дека Путин се плаши од Америка. Тоа го зборував и со американскиот претседател Доналд Трамп. Сигурен сум во тоа“, додаде Зеленски.
Украинскиот претседател направи и споредба меѓу политиките на актуелниот и поранешниот американски лидер во контекст на војната.
„Претседателот Трамп му дава шанса на Путин да стави крај на војната. Искрено се надевам дека, доколку тоа не се случи, Трамп ќе воведе санкции што нема да можат да се заобиколат и ќе ѝ обезбеди на Украина вистински одбранбен штит. Тоа навистина би направило разлика“, рече Зеленски, истовремено критикувајќи дека администрацијата на Џозеф Бајден не успеала да ја заврши војната.
