Белгиски војник кој учествувал во мисијата на НАТО во Литванија починал од повредите здобиени за време на воена вежба во петокот, потврдија белгиските власти. Според Политико, војникот починал во болница еден ден по несреќата.
Министерот за одбрана Тео Франкен и началникот на одбраната Фредерик Вансина во заедничко соопштение наведоа дека војникот бил повреден при вежба со минофрлачи.
Министерот Франкен на мрежата Х изрази „длабока тага за трагичната несреќа“ и упати сочувство и поддршка до семејството и колегите на загинатиот војник.
Литванскиот претседател Гитанас Науседа исто така испрати телеграма со сочувство, истакнувајќи дека белгиските трупи кои служат во Литванија „даваат непроценлив придонес за безбедноста на нашата нација и на целиот Алијанс“. Тој нагласи дека нивната посветеност и жртва нема да бидат заборавени.
Белгиското федерално обвинителство отвори истрага за инцидентот, објави агенцијата Белга, но дополнителни детали засега не се познати. Според VRT, местото на настанот во саботата го посетиле федерален судија и двајца детективи специјализирани за воени истраги. Паралелно, Министерството за одбрана на Белгија започна и внатрешна истрага.
Починатиот војник, чие име не е објавено, бил припадник на артилериски баталјон од Брасхат. Речиси 200 белгиски војници се распоредени во Литванија како дел од НАТО-мисијата за Засилено присуство напред, која опфаќа повеќе мултинационални борбени групи стационирани во осум источноевропски држави.
Литванија, потсетување, граничи со руската ексклава Калининград.
