Дел од персоналот во кралската резиденција во Сандрингам одбил да му служи на поранешниот британски принц Ендру Маунтбатен-Виндзор, поради контроверзните обвинувања за сексуална злоупотреба. Според извори на британскиот таблоид „Сан“, вработените биле информирани дека не мора да работат за него доколку тоа им создава непријатност, а веќе е составен „долг список“ на оние кои одбиваат да соработуваат.
Ендру, кој има 65 години, минатиот понеделник се иселил од Ројал Лоџ во Виндзор и привремено се населил во Сандрингам, додека неговиот нов дом, Марш Фарм, не биде готов во април. Изворите посочуваат дека постои загриженост дека поранешниот војвода ќе остане „тешко прифатлив“ за персоналот додека престојува во Сандрингам.
Овој потег следи по објавувањето на нови документи поврзани со осудениот сексуален престапник Џефри Епштајн, што дополнително го засили негативниот публицитет околу Ендру. Поранешниот принц веќе платил милиони долари за да ја реши граѓанската тужба поднесена од Вирџинија Џуфре, но продолжува да ги негира сите обвиненија за кривични дела.
Се смета дека преселбата на Ендру е дел од обидите на кралот Чарлс III да го „отстрани“ својот брат од јавниот живот, што кралот го пробувал последните три години. Според извори, Чарлс е делумно задоволен од потегот, но и „многу фрустриран“ од целата ситуација.
