Францускиот претседател Емануел Макрон предупреди европските лидери да не му веруваат на рускиот претседател Владимир Путин, во интервју за француската телевизиска станица „LCI“ објавено минатата недела.
– За да преживее, Путин мора да продолжи да „јаде“. Тоа го прави предатор, чудовиште пред нашата врата – рече Макрон, давајќи ја својата оценка по средбите со американскиот претседател Доналд Трамп, украинскиот лидер Володимир Зеленски и европските сојузници во Вашингтон.
Руското Министерство за надворешни работи остро ги осуди изјавите, оценувајќи дека преминуваат граници на разумот и пристојноста и упатуваат навреди против Русија и нејзиниот народ. Портпаролката Марија Захарова ги нарече изјавите „вулгарни“ на прес-конференција.
