Демократот Зохран Мамдани, кој во кампањата се претстави како „најлошиот кошмар на Доналд Трамп“, победи на изборите за градоначалник на Њујорк, објави NBC News. Со 34 години, Мамдани стана првиот муслиман, првиот јужноазиец и најмладиот градоначалник на Њујорк во последните сто години. Заклетвата ќе ја положи на Нова година.
„Жителите го дадоа својот мандат за промени, за град кој ќе може да си го дозволат“, изјави тој пред поддржувачите во Бруклин. Во говорот се обрати и кон претседателот на САД, Доналд Трамп, велејќи: „Зголемете ја јачината на звукот“ – порака со која нагласи дека Њујорк ќе остане град на имигранти.
Излезноста на изборите беше рекордна, со повеќе од два милиони гласачи. Противкандидатите Ендру Куомо и Кертис Слива го признаа поразот и му честитаа.
Мамдани во кампањата се залагаше за прифатливо домување, бесплатен јавен превоз, универзална грижа за деца и зголемен данок за приходи над еден милион долари. Неговата кампања беше цел на исламофобични напади, за кои тој ја обвини кампањата на Куомо и потпретседателот Џеј Ди Венс.
Мамдани е роден во Уганда, одраснал во САД, а пред политиката бил активен како рапер. Во 2020 година влезе во Државното собрание на Њујорк како прв претставник од Јужна Азија и Уганда во тоа тело. Познат е по поддршката за палестинската држава и политиките за зголемување на даноците за најбогатите.
Претседателот Трамп го нарече „комунист“, обвинувајќи го за „опасни политики“, на што Мамдани одговори дека Њујорк „ќе покаже дека невозможното може да стане возможно“.
