Палестинското исламско движење Хамас предупреди дека израелските заробеници ќе бидат изложени на „исти ризици“ како и нивните борци во офанзивата што израелските сили ја подготвуваат во градот Газа.
„Ќе се грижиме за заробениците најдобро што можеме, а тие ќе бидат со нашите борци во зоните на борба и судири, изложени на исти ризици и услови за живот“, се наведува во соопштението на Хамас, приписано на портпаролот на вооруженото крило, познат под воениот прекар Абу Обеида.
„За секој заробеник убиен во агресијата ќе објавиме име, фотографија и доказ за смртта“, додаваат од Хамас.
Владата на израелскиот премиер Бенјамин Нетанјаху нареди војската да се подготви за голема офанзива со цел уништување на Хамас и ослободување на сите заробеници во појасот Газа.
Портпаролот на израелската војска, Авичај Адраее, изјави дека војската спроведува „претходни операции“ во предградијата на Газа, сигнализирајќи дека е подготвена за целосно освојување на градот. Израел планира од Газа да пресели речиси еден милион луѓе кон југот на појасот.
