Иранската војска најави дека нејзиниот одговор на заедничките американско‑израелски воздушни удари ќе биде „се поширок и поинтензивен“, соопшти денеска портпаролот на Централниот штаб, полковник Ибрахим Золфгари.
Тој истакна дека Техеран продолжува активно да ги пресретнува и неутрализира израелските и американските летала и беспилотни летачки системи над различни делови од земјата. Според Золфгари, израелските сили намерно ги позиционирале своите борбени средства меѓу цивилни згради и јавни инфраструктури, обидувајќи се да ги сокријат од иранските противвоздушни единици.
„Голем дел од воените ресурси на таканаречениот ционистички режим се сместени меѓу цивили, но нашите сили продолжуваат да ги лоцираат и да ги напаѓаат тие објекти“, рече Золфгари, додавајќи дека нападите врз „агресорите“ ќе се поинтензивираат во наредните денови и ќе бидат проширени на повеќе цели.
Во своето обраќање, тој наведе дека рано утрово иранските воздухопловни сили успеале да соборат еден борбен авион F‑15E, како и четири напредни беспилотни летала, вклучувајќи модели Hermes 900 и MQ‑9, додека тие оперирале над западните, југозападните и јужните региони на Иран.
