Германија во наредните години би можела да се соочи со сериозен недостиг на квалификувана работна сила. Според проценките објавени од „Шпигел“, до 2029 година на германскиот пазар на труд би можеле да недостигаат околу 723.000 работници.
Недостигот особено ќе биде изразен во неколку сектори, каде што веќе сега има голема побарувачка за работници.
На врвот на листата е секторот за продажба, во кој до 2029 година би можеле да недостигаат околу 39.100 работници.
Веднаш потоа следува грижата за деца, каде што се очекува недостиг од околу 29.900 вработени. Во областа на социјалната работа и социјалната педагогија би можеле да останат непополнети околу 23.600 работни места.
Германскиот пазар ќе има потреба и од голем број работници во здравството и медицинската грижа, каде што се проценува дека ќе недостигаат околу 18.700 луѓе.
Недостиг се очекува и во електроиндустријата, со проценети 17.000 непополнети работни места.
Еден од главните проблеми е стареењето на работната сила. Авторот на студијата, Александар Бурштеде, предупредува дека во следните години голем број работници ќе заминат во пензија, додека бројот на нови работници кои доаѓаат од странство нема да биде доволен целосно да го надомести нивното заминување.
Проблемот веќе е забележлив на германскиот пазар на труд. Според актуелните податоци, минатата година недостигале речиси 370.000 квалификувани работници.
Доколку сегашните проекции се остварат, до 2029 година недостигот би можел речиси да се удвои и да достигне околу 723.000 работници.
Најголема потреба се очекува во професиите поврзани со продажбата, грижата за деца, социјалната работа, здравството и електротехниката, што отвора простор за нови вработувања и за странски работници кои ги поседуваат потребните квалификации.
