Германската АфД и Кирил Дмитриев, близок економски советник на рускиот претседател Владимир Путин, започнале подготовки за можна средба во 2027 година на која би се разговарало за повторно воспоставување на испораката на руски гас за Германија, објави „Ројтерс“, повикувајќи се на два извора запознаени со планот.
На потенцијалната средба би учествувале Дмитриев, кој го раководи и рускиот државен инвестициски фонд, како и копретседателите на АфД, Алис Вајдел и Тино Крупала.
Според информациите, разговорите би можеле да се одржат уште во март 2027 година, но само доколку претходно биде постигната рамка за мировен договор меѓу Русија и Украина. Како можни локации се споменуваат Израел, Обединетите Арапски Емирати и Индија.
Во фокусот би било повторното воспоставување на руските испораки на гас за Германија, како и можноста за повторно активирање на гасоводите „Северен тек“.
АфД со години се залага за обновување на економските врски со Москва. Лидерката на партијата Алис Вајдел во јуни за „Ројтерс“ изјави дека Германија треба да го прекине бојкотот на рускиот нафтен и гасен сектор, оценувајќи дека евтината руска енергија била важен фактор за успехот на германската економија.
Организаторите на средбата се надевале дека на разговорите би можеле да присуствуваат и американските претставници Стив Виткоф и Џаред Кушнер. Сепак, висок американски претставник за „Ројтерс“ изјавил дека тие не биле информирани за планираниот состанок и не добиле покана.
Идејата за обновување на руските енергетски испораки наиде на критики од германски политичари, кои предупредуваат дека повторната зависност од рускиот гас би создала безбедносни и економски ризици.
Од друга страна, поддржувачите на иницијативата во АфД ја претставуваат евтината енергија како начин за намалување на притисокот врз германската економија и домаќинствата.
Потенцијалната средба би имала пред сè политичко и симболично значење, бидејќи АфД не е дел од германската сојузна влада и не може директно да донесува одлуки за енергетската политика на земјата.
Во меѓувреме, Кремљ денеска позитивно се изјасни за интересот на АфД за дијалог со Москва. Портпаролот Дмитриј Песков изјави дека партијата, како политичка сила која покажува растечка поддршка во Германија и се залага за воспоставување односи со Русија, е нешто што Москва го гледа позитивно.
