Во неколку делови од Скопје во изминатите денови се пријавени случаи на појава на змии, што предизвика забележлива вознемиреност кај жителите, особено затоа што дел од нив се во густо населени и често посетувани градски зони.
Според објавите што кружат на социјалните мрежи и сведоштвата на граѓани, змии биле забележани на повеќе локации: на патниот правец меѓу Горно и Долно Лисиче на 29 април, во близина на Кванташкиот пазар на 11 мај, како и во населбата Аеродром, на улицата „Владимир Комаров“ број 27, каде змија била забележана на 10 мај. Фотографии и видеа од овие ситуации брзо се проширија онлајн, дополнително засилувајќи ја загриженоста кај јавноста.
Иако ваквите појави не се невообичаени во пролетниот и летниот период, кога повисоките температури ги активираат влекачите и ги поттикнуваат да излегуваат од нивните природни живеалишта, проблемот повторно ја отвора темата за одржувањето на јавните и запуштени површини во урбаните средини.
Граѓаните сè почесто реагираат дека тревниците, празните парцели и дивите депонии создаваат услови за појава на вакви животни, особено во периферните и недоволно одржувани делови од градот. Во таков контекст се поставува прашањето за институционалната одговорност и координацијата меѓу градските и општинските служби.
Од Град Скопје претходно има став дека директната надлежност за дератизација и интервенции во случаи со змии и други животни во урбана средина не е во негови раце, туку согласно законските решенија е распределена на скопските општини. Тие, пак, се задолжени за редовно одржување на јавната хигиена, вклучително косење на тревни површини, расчистување на запуштени простори и организирање интервенции преку стручни служби кога ќе се појави проблем.
Сепак, и покрај формалната распределба на надлежностите, останува просторот за превентивно делување на градско ниво. Преку јавните претпријатија, како и преку координација со општините, Градот може да има значајна улога во уредување на јавните површини, отстранување на отпад и одржување на зеленилото.
ЈП „Паркови и зеленило“ управува со голем дел од градските зелени површини, а токму редовното косење, чистењето на запуштени локации и одржувањето на каналите се посочуваат како клучни мерки за намалување на ризикот од појава на змии во урбани средини.
