Стејт департментот на САД воведе замрзнување на визите за 75 земји, вклучувајќи ја и Македонија, на неодредено време додека трае ревизија на процедурите за проверка и проценка на апликантите. Целта е да се спречи влез на лица кои би можеле да станат „јавен товар“, односно да зависат од социјална помош.
Покрај Македонија, на листата се наоѓаат Србија, Босна и Херцеговина, Црна Гора, Косово, Русија, Иран, Авганистан, Бразил, Тајланд, Ирак и други земји. Во ноември 2025 година, Стејт департментот испратил дипломатска депеша до своите претставништва со инструкции строго да се применуваат новите правила за проверка според одредбата за „јавен товар“. Конзуларните службеници добиле насоки да одбиваат визи врз основа на законски критериуми како здравствената состојба, возраста, финансиската стабилност, познавањето на англиски јазик и евентуалната потреба од долготрајна медицинска нега.
Потенцијално неподобни за влез се постари лица, лица со прекумерна телесна тежина, како и оние кои во минатото користеле државна помош или биле институционализирани. „Стејт департментот ќе го користи своето овластување да ги прогласува за неподобни потенцијалните имигранти кои би ја злоупотребиле дарежливоста на американскиот народ“, изјави портпаролот Томи Пигот.
Исклучоци ќе бидат дозволени само во многу ограничени случаи по дополнителна проверка. Замрзнувањето на визите ќе остане во сила сè додека не биде завршена целосната проценка на имиграциските процедури.
Оваа одредба за „јавен товар“ постои со децении, но нејзината примена се менувала во различни администрации. Претседателот Доналд Трамп во 2019 година ја прошири дефиницијата за да вклучи поширок опсег социјални бенефиции, но таа одлука беше оспорена на суд и делумно блокирана, а подоцна укината од администрацијата на Џо Бајден.
Целосната листа на земји вклучува: Авганистан, Албанија, Алжир, Антигва и Барбуда, Ерменија, Азербејџан, Бахами, Бангладеш, Барбадос, Белорусија, Белизе, Бутан, Босна и Херцеговина, Бразил, Мјанмар, Камбоџа, Камерун, Кејп Верде, Колумбија, Брегот на Слоновата Коска, Куба, Демократска Република Конго, Доминика, Египет, Еритреја, Етиопија, Фиџи, Гамбија, Грузија, Гана, Гренада, Гватемала, Гвинеја, Хаити, Иран, Ирак, Јамајка, Јордан, Казахстан, Косово, Кувајт, Киргистан, Лаос, Либан, Либерија, Либија, Македонија, Молдавија, Монголија, Црна Гора, Мароко, Непал, Никарагва, Нигерија, Пакистан, Република Конго, Русија, Руанда, Сент Китс и Невис, Сент Лусија, Сент Винсент и Гренадини, Сенегал, Сиера Леоне, Сомалија, Јужен Судан, Судан, Сирија, Танзанија, Тајланд, Того, Тунис, Уганда, Уругвај, Узбекистан и Јемен.
