Од четврток, 29 октомври, почнува официјалната примена на електронскиот паричник, преку кој граѓаните ќе имаат пристап до податоците од личната карта и возачката дозвола на својот мобилен телефон. Промоцијата на апликацијата е најавена за среда, 28 октомври.
Министерот за дигитална трансформација, Стефан Андоновски, изјави дека апликацијата ќе овозможи корисниците да избираат кои лични податоци ќе ги споделат при идентификација.
Според неговото објаснување, наместо да ги покажуваат сите податоци од физичкиот документ, граѓаните ќе можат да ги откријат само избраните информации.
Размената ќе се врши преку QR-код за еднократна употреба. Другото лице ќе ги добие податоците само со дозвола на корисникот, а кодот ќе истекува по 10 до 15 секунди.
„Многу внимание посветивме на безбедноста“, истакна Андоновски.
Министерот го опиша воведувањето на апликацијата како почеток на процес што треба да води кон европскиот дигитален паричник и поширока дигитализација на документите.
Во почетната фаза ќе бидат достапни основните податоци од личната карта и возачката дозвола, а со натамошниот развој се планира додавање нови документи, услуги и можности.
Во најавата не е прецизирано во кои постапки дигиталниот приказ ќе може целосно да го замени физичкиот документ.
