Министерот за внатрешни работи Панче Тошковски изјави дека досегашните проверки и тестирања на камерите од системот „Сејф сити“ покажуваат минимални технички отстапки, што, според него, укажува на високо ниво на точност и подготвеност на системот.
Тошковски нагласи дека камерите се предмет на континуирани технички проверки, калибрации и верификации, со цел да се обезбеди нивна целосна функционалност и правичност при евидентирањето на сообраќајните прекршоци. Според него, утврдените отстапки се во рамки на дозволените стандарди и не влијаат врз кредибилитетот на системот.
Министерот потсети дека проектот „Сејф сити“ е клучен дел од напорите за зголемување на безбедноста во сообраќајот, а неговата цел не е казнување, туку превенција и намалување на сообраќајните несреќи со тешки последици.
Системот овозможува автоматско детектирање на прекршоци како пречекорување на брзината, минување на црвено светло и други сообраќајни прекршоци, без директна интервенција на полициски службеници на терен.
