Цените на авионските билети влегуваат во нова фаза на поскапување, поттикнати од растот на цената на авионското гориво во услови на геополитички тензии поврзани со Иран. Но, иако многумина би очекувале олеснување кога горивото ќе поевтини, авиокомпаниите испраќаат поинаква порака: билетите најверојатно ќе останат скапи.
Причината не е само во нафтата. Пазарот на патувања доживува силен бум, со рекордни резервации кои им овозможуваат на авиопревозниците да држат високи цени без страв од пад на побарувачката. Во таква средина, цената на билетот сè помалку зависи од трошоците, а сè повеќе од тоа колку патниците се подготвени да платат.
Извршните директори на големите американски авиокомпании отворено признаваат дека новото ниво на цени станува „нормала“. Првиот човек на „Јунајтед“, Скот Кирби, укажува дека потрошувачите веќе се навикнуваат на поскапите билети, а компаниите сè поудобно функционираат со тие приходи. Според него, колку подолго трае ваквата состојба, толку потешко ќе се врати назад.
Сличен став има и раководството на „Американ ерлајнс“, кое забележува дека патниците не само што продолжуваат да купуваат билети и покрај повисоките цени, туку и сè почесто плаќаат дополнително за удобности – повеќе простор, подобра позиција во авионот или пофлексибилни услуги. Тоа, според компанијата, покажува дека побарувачката останува силна дури и во поскап пазар.
Во позадина, трошоците за гориво се клучниот удар. Неговата цена речиси двојно се зголемила од почетокот на годината, а за големите американски превозници тоа значи дополнителни милијарди долари трошоци. Само една од компаниите, „Делта“, пријавила зголемување од околу две милијарди долари во еден квартал.
Иако дел од овие трошоци се префрлаат врз патниците, цените на билетите не се одредуваат директно според расходите. Авиоиндустријата работи според сложена логика на понуда и побарувачка: време на патување, конкуренција на рутата и период од неделата често имаат поголемо влијание од самата цена на горивото. Затоа, исти летови можат значително да се разликуваат по цена, зависно од моментот на купување и пополнетоста.
Во обид да се прилагодат на повисоките трошоци, авиокомпаниите веќе ги намалуваат помалку профитабилните линии. Некои летови се укинуваат, што парадоксално ја зголемува просечната цена на останатите билети. Помалата понуда значи и поголема контрола врз цените.
Дополнителен фактор е неизвесната иднина на нискобуџетните превозници, кои традиционално го одржуваа притисокот врз цените надолу. Ако дел од нив се повлечат или значително се намалат, простор за поевтини билети уште повеќе ќе се стесни, што им оди во прилог на големите компании.
