Земјоделците повторно ќе имаат пристап до средствата од ИПАРД програмата, по завршувањето на постапките за вонредна проверка што беа иницирани по неодамнешните случувања во Агенцијата за финансиска поддршка во земјоделството.
Владата, како што соопштува ВМРО-ДПМНЕ, реагирала навремено и го активирала националниот механизам за надзор, при што побарала од Европската комисија да спроведе детална контрола на начинот на користење на европските фондови. Целта, според нив, била да се расчистат сите сомнежи и да се спречи нарушување на довербата во институциите и во системот за поддршка на земјоделството.
По спроведената проверка, од Европската комисија било констатирано дека не се утврдени неправилности во постапките за користење на средствата, со што, како што се наведува, се потврдува дека системот функционира согласно правилата.
Од владејачката партија истакнуваат и дека средствата од Брисел никогаш не биле формално блокирани, одговарајќи на, како што велат, спротивни тврдења пласирани од опозицијата. Според нив, ваквите обвинувања биле неточни и создале забуна кај јавноста и земјоделците.
Во своето соопштение, ВМРО-ДПМНЕ нагласува дека фокусот останува на транспарентност, соработка со европските институции и заштита на интересите на корисниците на ИПАРД програмата, оценувајќи дека последниот исход претставува потврда за исправноста на преземените чекори.
