По серијата остри потези на Вашингтон кон Каракас, американскиот претседател Доналд Трамп отвори нов фронт во својата реторика – овојпат насочен кон Богота. Според германската агенција ДПА, Трамп јавно ја стави Колумбија во центарот на вниманието со тешки обвинувања и заканувачки тон.
Во разговор со новинарите, претседателот ја опиша Колумбија како „длабоко проблематична држава“, тврдејќи дека е водена од „болен човек“ кој, според него, има намера да произведува кокаин и да го преплави американскиот пазар со дрога. „Тоа нема да трае уште долго“, рече Трамп, оставајќи ја изјавата без дополнително објаснување, но со јасна порака.
Иако во минатото неколкупати жестоко ги напаѓаше политиките на колумбискиот претседател Густаво Петро, овојпат Трамп избегна директно да го спомене по име. Изјавите ги даде на пат кон Вашингтон, по враќањето од одмор во Флорида, пренесува ДПА.
Тензиите дополнително се зголемија кога новинар го праша дали САД размислуваат за воена интервенција против Колумбија. „Тоа звучи како добра опција“, одговори Трамп, со што ја подгреа загриженоста за можна ескалација во регионот.
Само неколку часа претходно, американските сили извршија воздушни напади врз цели во Венецуела. Во таа акција, според извештаите, беше приведен претседателот Николас Мадуро и итно изнесен од земјата заедно со сопругата. Очекувањата се дека Мадуро ќе се соочи со судење во Њујорк под обвиненија за трговија со дрога.
