Општина Гази Баба интензивно го искористи летниот период за градежно-занаетчиски активности со цел подобрување на условите за образование и воспитание во основните училишта на нејзина територија, информираше градоначалникот Бобан Стефковски.
Завршена е комплетната реконструкција на спортската сала во ООУ „Његош“, која сега нуди модерни услови за часови по физичко образование, спортски активности и училишни настани. Исто така, се изврши целосна реконструкција на тоалетите во ООУ „Стив Наумов“ и ООУ „25 Мај“, обезбедувајќи пристојни, хигиенски и функционални простории за учениците.
Дополнително, во сите училишта во општината беа реализирани мали поправки, уредување на училници и зајакнување на инфраструктурата која влијае врз квалитетот на образованието и работата на наставниот кадар.
„Со овие активности, сите училишта во Гази Баба се целосно подготвени за стартот на новата учебна година. Општината продолжува да инвестира во образованието, создавајќи безбедна и модерна средина која ги поддржува развојот и креативноста на младите“, порача Стефковски.
