Жителите на неколку улици во општина Центар денеска ќе се соочат со привремени прекини во водоснабдувањето, информираат од ЈП „Водовод и канализација“ – Скопје.
Интервенцијата која првично беше најавена за отстранување на дефект на водоводната мрежа на улицата „Црвена Вода“, поради технички причини е поместена и ќе се реализира денес. Од 09:00 часот па сè до целосното завршување на работите, без вода ќе останат домаќинствата и објектите на оваа улица.
Паралелно со тоа, нов прекин е најавен и на улицата „20-ти Октомври“ бб, каде од 10:30 часот ќе се изведува приклучок на водоводна цевка со пречник од Ф80 милиметри. До комплетирање на градежните активности, дел од корисниците на оваа улица ќе имаат прекинато водоснабдување.
Од претпријатието апелираат граѓаните за трпение, нагласувајќи дека станува збор за неопходни технички зафати со цел подобрување на водоводната мрежа.
