Министерството за здравство најави дека уште три компании кои одгледуваат медицински канабис ќе останат без лиценци, откако контролите утврдиле сериозни пропусти во нивното работење. Одлуката доаѓа по засилените инспекции спроведени во компаниите кои поседуваат дозволи за производство на канабис за медицински цели.
Според информациите од Министерството, претходно веќе биле одземени лиценците на шест компании, а со новата мерка вкупниот број на фирми кои ќе го изгубат правото за производство на медицински канабис ќе достигне девет.
Министерот за здравство изјавил дека контролите опфатиле десетици компании и дека кај дел од нив биле утврдени различни неправилности – од административни и инфраструктурни проблеми до недостатоци во технолошките процеси и човечките ресурси.
Вонредните проверки продолжуваат и во други компании кои имаат лиценци за одгледување медицински канабис. Според најавите, инспекциите ќе ги опфатат вкупно 43 правни субјекти кои поседуваат дозволи за оваа дејност во земјата.
Засилените контроли следуваат по серијата заплени на големи количини канабис во регионот, меѓу кои и рекордни десетици тони марихуана поврзани со компании што имале лиценци за медицинско производство.
Од Министерството нагласуваат дека целта на акцијата е да се воспостави строга контрола врз производството на медицински канабис, за да се спречат злоупотреби и евентуално пренасочување на производството кон нелегалниот пазар.
Одгледувањето канабис за медицински цели во Македонија е дозволено од 2016 година, но само за компании кои добиле лиценца од Министерството за здравство и одобрение од Владата.
