Денеска во Министерството за здравство се одржа првата конститутивна седница на Здравствениот совет, на која присуствуваше министерот за здравство, Азир Алиу.
Здравствениот совет, како советодавно тело на министерот согласно Законот за здравствена заштита, е составен од девет еминентни професори и доктори на науки во различни специјалности, меѓу кои се и меѓународно признати експерти со богата стручна биографија.
„Целта е Здравствениот совет континуирано да ги анализира прашањата од областа на здравството, да дава стручни мислења и предлози при подготовката на закони и подзаконски акти, како и поддршка во различни области од делокругот на Министерството. Денешната дискусија беше иницијална, за повеќе аспекти кои во наредниот период советот ќе ги анализира. Уверен сум дека ќе имаме успешна и плодна соработка“, изјави Алиу.
Членови на Здравствениот совет се: проф.д-р Сашко Кедев, проф.д-р Марија Срцева, проф.д-р Азис Положани, проф.д-р Виктор Камнар, проф.д-р Светозар Антовиќ, проф.д-р Игор Кафтанџиев, прим.ас.д-р спец. Фадил Цана, спец.д-р Злате Мехмедовиќ и доц.д-р Илир Вела. За претседател на советот е избрана проф.д-р Марија Срцева.
