Познат шпански механичар го посочи Volvo како производител на автомобили со исклучително издржливи мотори, потсетувајќи на неверојатниот пример на Volvo 1800S од 1966 година, кој поминал повеќе од 5,2 милиони километри.
Автомобилот бил во сопственост на Американецот Ирв Гордон, кој го купил на 30 јуни 1966 година за 4.150 долари. Тој останал верен на својот Volvo до смртта во 2018 година, а неговото достигнување е запишано и во Гинисовата книга на рекорди.
<strong>„Најдобриот мотор на светот е Volvo“</strong>
Приказната за автомобилот повторно ја актуелизирал шпанскиот механичар Хуан Хозе Ебенезер, зборувајќи за сигурноста и издржливоста на автомобилските мотори.
„Најдобриот мотор на светот е Volvo. Иако дизел-моторите обично се сметаат за оние со кои се поминува огромна километража, овој мотор бил исклучително издржлив“, изјавил Ебенезер.
Во Volvo 1800S на Гордон се наоѓал 1,8-литарски бензински мотор со четири цилиндри и работна зафатнина од 1.778 кубни сантиметри. Станува збор за моторот B18, познат по својата робусност.
Сепак, постои важен детал. Иако моторот бил оригинален, не ги поминал сите 5,25 милиони километри без ремонт. Според Volvo, моторот бил целосно обновен двапати во текот на животниот век на автомобилот.
Првиот голем ремонт бил направен откако автомобилот поминал околу 675.000 милји, односно приближно 1,09 милиони километри.
<strong>Уште првиот викенд поминал над 2.400 километри</strong>
Гордон бил наставник по природни науки од Лонг Ајленд, а секојдневното патување до работното место придонело километражата брзо да расте.
Но, тој не го користел автомобилот само за работа. Гордон бил страстен патник и со својот Volvo поминал огромни растојанија низ САД.
Само во првиот викенд по купувањето поминал околу 1.500 милји, односно повеќе од 2.400 километри, по што автомобилот го однел на првиот сервис.
Во 1987 година Volvo веќе имал поминато еден милион милји. Границата од два милиони ја достигнал во 2002 година, а на 18 септември 2013 година, на Алјаска, Гордон ја поминал неверојатната граница од три милиони милји.
До 1 мај 2014 година биле евидентирани 3.039.122 милји.
<strong>Тајната била во редовното одржување</strong>
И покрај неверојатната километража, Гордон никогаш не тврдеше дека постои некаква „магична формула“ за издржливост на автомобилот.
Напротив, тој сметал дека најважно е редовното одржување и почитувањето на препораките на производителот.
На сопствениците на автомобили им советувал внимателно да ги читаат упатствата и навреме да ги извршуваат сервисите. Голем дел од одржувањето на својот Volvo, според информациите за автомобилот, го вршел и самиот.
Колку му верувал на автомобилот покажува и фактот што тврдеше дека Volvo никогаш не го оставил на патот или одбил да запали, дури ни во тешки зимски услови.
<strong>Повеќе од 5,2 милиони километри</strong>
До смртта на Гордон во ноември 2018 година, бројачот на неговиот Volvo покажувал 3.260.257 милји, односно приближно 5.246.875 километри.
По неговата смрт автомобилот бил во сопственост на Volvo. Производителот подоцна објави дека легендарниот автомобил продолжил внимателно да се вози.
Дали Volvo навистина има „најдобар мотор на светот“ е прашање за кое може да се расправа. Но, примерот на Гордон е конкретен доказ за тоа колку далеку може да стигне добро одржуван автомобил.
Повеќе од пет милиони километри, оригинален мотор кој бил двапати обновен и повеќе од пет децении редовна употреба го направија овој Volvo еден од најпознатите автомобили во историјата по својата издржливост.
