Во Скопје се случи вечер која публиката ќе ја памети долго, концертот на Јаков Јозиновиќ во салата „Јане Сандански“ се претвори во вистинска експлозија од емоции, енергија и целосна музичка еуфорија.
Уште пред да се појави на сцената, салата беше преполна до последното место, а во воздухот се чувствуваше напнато исчекување. Кога светлата се изгасија и музичарите го најавија почетокот, беше јасно дека следуваат часови во кои границата меѓу изведувач и публика целосно ќе исчезне.
Од првиот чекор на сцената, Јаков ја „запали“ атмосферата. Публиката реагираше како да го чекала токму тој момент со години: пееше, скандираше и буквално ја следеше секоја негова нота. Ниту една песна не помина без хор од илјадници гласови кои ги знаеја стиховите напамет, создавајќи впечаток на заеднички настап, а не класичен концерт.
Без класични паузи, без гости и без театарски прекини, настапот течеше во еден здив. Повеќе од два часа сцената беше центар на непрекината енергија. Концептот беше јасен – директен контакт со публиката и целосно рушење на дистанцата меѓу бината и фан-питот.
Во еден од најсилните моменти на вечерта, Јаков слезе меѓу публиката, влегувајќи во најгустата гужва. Наместо да се држи на безбедна дистанца, направи круг меѓу фановите, им подаде рака, комуницираше со нив и повторно се врати на сцената како ништо да не се случило, но со уште поголема експлозија од аплауз.
Она што ја правеше сцената посебна беше и мешавината од генерации: млади, постари, семејства, сите заедно во ист ритам. Една страна од публиката пееше и танцуваше со носталгија, додека друга го снимаше секој момент, но подеднакво гласно учествуваше во атмосферата.
Јаков постојано комуницираше со присутните, се шегуваше, реагираше на нивните повици и дури симболично ја „мереше“ бучавата во салата, прогласувајќи го Скопје за најгласна публика од турнејата. Токму таа интеракција ја претвори вечерта во нешто повеќе од концерт, во заедничко доживување.
Речиси целиот настап го изведе без слушалки, што само ја засили перцепцијата дека целосно му верува на својот глас и на сопствената изведба. Во текот на вечерта премиерно ја претстави и новата песна „Јас за љубов летам“, која е дел од албумот и ја носи енергијата на целата турнеја.
