Регулаторната комисија за енергетика (РКЕ) со нова одлука ги коригира малопродажните цени на горивата, при што дел од дериватите поскапуваат, а дел бележат минимално намалување.
Најголемата промена се однесува на бензините и дизелот. ЕУРОСУПЕР БС-95 од денес се продава по повисока цена за 2,00 денари за литар и достигнува 87,00 денари. Поголем раст е забележан кај ЕУРОСУПЕР БС-98 и ЕУРОДИЗЕЛ (Д-Е V), кои поскапуваат за по 2,50 денари за литар. Со тоа, литар бензин БС-98 чини 89,00 денари, додека дизелот се продава по 92,00 денари.
За разлика од транспортните горива, Екстра лесното масло за домаќинство (ЕЛ-1) има благ пад на цената. Се намалува за 0,50 денари за литар и сега изнесува 93,50 денари.
Промени има и кај мазутот М-1 НС, кој поскапува за 0,846 денари за килограм. Новата цена за овој енергенс изнесува 50,814 денари за килограм.
Од РКЕ посочуваат дека новите цени се усогласени со актуелните пазарни движења на нафтените деривати.
