Романските истражни органи објавија нови детали за бруталното убиство на 15-годишниот Марио, кој беше намамен и усмртен од свои врсници во близина на српско-романската граница, случај што ја потресе јавноста во целиот регион.
Според информациите што ги пренесува Observer News, истрагата покажала дека злосторството не било спонтано, туку планирано однапред. Малолетниците осомничени за убиството со денови разговарале за нападот, а мотивот бил љубомора и завист кон жртвата – поради материјални работи, популарност и внимание што го добивал во средината.
Марио бил намамен со лажен изговор да дојде на договорена локација, каде бил нападнат. По злосторството, сторителите се обиделе да ги прикријат трагите, што дополнително ја отежнало потрагата по исчезнатото момче.
Обвинителството потврди дека:
двајца малолетници (15 години) се во притвор и се товарат за тешко убиство;
трето лице (13 години) е идентификувано како учесник, но поради возраста не може кривично да одговара;
истрагата е проширена и се проверува дали имало уште лица кои знаеле за планот, а не го пријавиле.
Семејството на жртвата побара најстрога можна казна, додека јавноста во Романија остро реагираше, отворајќи дебата за врсничкото насилство, социјалните мрежи и радикализацијата на малолетниците.
