Трагичен настан се случил вчера попладне во гостиварското село Градец, при што животот го загубил 48-годишен маж од Тетово за време на изведување градежни работи на приватен објект.
Според информациите од полицијата, случајот бил пријавен на 21.04.2026 во 17:00 часот во Полициското одделение Галате. Несреќата се случила додека работникот се обидувал да одглави заглавена сајла на кран, при што дошло до ненадејно пукање на метален дел од конструкцијата.
Од силниот удар во пределот на главата, мажот се здобил со тешки повреди кои биле фатални. На местото на настанот пристигнала екипа на Итната медицинска помош, каде лекар констатирал смрт.
Увид на местото извршиле јавен обвинител и полициски екипи од ОВР Гостивар, а за настанот бил известен и надлежен инспекторат кој треба да ги утврди сите околности под кои се случила несреќата.
По наредба на јавен обвинител, телото на починатиот е предадено на обдукција, која треба да даде дополнителни информации за причините за смртта.
Надлежните институции најавуваат темелна истрага, со цел да се утврди дали биле почитувани сите безбедносни протоколи при изведување на градежните работи.
