Двајца малолетници од Радовиш синоќа предизвикале пожар на автобус кој бил паркиран во дворот на Основното училиште „Крсте Петков Мисирков“, информираат од СВР Струмица.
Настанот бил пријавен на 25 јануари 2026 година околу 20:30 часот во Полициската станица Радовиш, откако било забележано дека гори автобус во училишниот двор. На местото интервенирала Територијалната противпожарна единица Радовиш, која успешно го изгаснала пожарот. Повредени лица нема.
По преземени мерки и активности, полициските службеници утврдиле дека пожарот бил намерно предизвикан од двајца малолетници. Со нив биле извршени службени разговори во присуство на нивните родители, при што тие го признале делото. Од нив била одземена и запалката со која го предизвикале пожарот.
За случајот бил известен јавен обвинител од Основното јавно обвинителство Струмица, а по целосно документирање ќе биде поднесена соодветна пријава.
