Во српските градови Бачка Паланка и Врбас синоќа избувнаа немири, откако, според тврдењата на независните медиуми, поддржувачи на владејачката СНС брутално нападнале граѓани кои се собрале во знак на поддршка на претходно нападнат сограѓанин. Маскирани напаѓачи фрлале камења, шишиња, јајца и пиротехнички средства, додека полицијата, како што се наведува, не реагирала.
Нападот во Бачка Паланка се случил околу 21:40 часот, паралелно со сличен инцидент во Врбас, каде полицијата ги разделувала двете групи, но без да го спречи насилството. По немирите, организаторите го прекинале собирот и повикале граѓаните утре да се соберат во местото Пивнице, во поддршка на директор на кој му се заканува отказ поради поддршка на студентите.
Студентот Милош за Н1 изјавил дека ден претходно дошле пред просториите на СНС за да го поддржат Драган Прпа, нападнат во Бачки Петровац, но таму ги дочекале поддржувачи на владејачката партија. Според него, полицијата била присутна, но не реагирала на нападите, иако граѓаните биле гаѓани со разни предмети.
Причината за денешното собирање била поддршка на сограѓанин кој синоќа бил физички нападнат додека минувал покрај контрапротест. Тој завршил во болница, а граѓаните најавија дека ќе продолжат со протестите сè додека не се преземат мерки против насилството и не се исполнат барањата за нови избори и ослободување на уапсените.
